【八方相當年】12粒字「冤」俞琤 素人劉卓裕發過DJ夢
蘋果日報 2019/12/13 06:00
八方相當年劉卓裕
做得區議員，必定要夠chur，相信喺荃灣「愉景」選區撼低田北辰嘅候任議員劉卓裕（Adrian）完全qualified。Adrian自爆年輕時發過明星夢，唔係對個樣有自信，「而係好多人都話我把聲幾好聽」，讀大學嗰陣有緣遇上商台高層俞琤，毛遂自薦做DJ，翌日獲得面試機會，雖然落選，但佢冇放棄，寫信畀俞琤「冤」住對方，信中12粒字：「給我一個機會，還你一個奇蹟」，終於令佢同年聖誕可以喺商台做Promotion Assistant，負責過叱咤頒獎禮同《喜劇之王》演員訓練班項目。DJ夢不成，反送中運動下再「發夢」，終於突圍以連登仔「自由系」素人身份，揮低政治明星田二少踏政途。
43歲嘅Adrian人生上半場，查實同政治無關。葵興屋邨長大，小時讀荃灣官立小學，雖然讀A班，但唔歸功自己勤力讀書，「係阿媽迫我」。中學讀荃灣聖芳濟中學，雖然呢間出產唔少政界名人包括立法會主席梁君彥、發展局局長黃偉綸同前運房局副局長邱誠武等嘅區內名校，籃球足球等運動好出色，但Adrian話佢比較靜，唔多參加球類運動，「可能細個俾個波省過，有陰影，哈哈。」
中六時擔任校刊《探驪》總編輯，「其實我都幾鍾意『撚』字」，最記得有份製作30周年校刊，由冇到有、由編採到排版一手包辦，滿足感油然而生。大學喺嶺大讀工商管理，喺社會打滾後再喺港大社會科學碩士畢業，「當時好想鼓勵姪女，咁老都可以讀到書㗎。」
雖然發過DJ夢，但Adrian自覺適合幕後多啲，大學畢業後加入公關公司，負責過唔少國際品牌及活動，工作關係令佢經常有機會近距離接觸天王、天后 ，林憶蓮、吳彥祖、阿Sa等都曾被集郵，最難忘喺一個event「拯救」被粉絲包圍嘅哥哥張國榮，「老闆話要拉哥哥去台前，冇人敢去， 咁咪我去囉，結果拉住佢隻手呀⋯⋯」
雖然「從政」兩粒字，人生從來冇出現，但19歲讀緊大學一年班時喺民主黨蔣月蘭議辦做過兼職助理，旨在賺吓生活費，原來當時蔣月蘭問過佢想唔想做區，佢即時耍手擰頭，「因為我最鍾意係喺中環返工」。當時未踏從政路，卻為依家做區議員打咗少少根基，至少識得點做地區case。有乜公關技能可以用於做區？佢話需要客戶服務同善用social media。當選至今近三星期，至今有樣嘢仲未好適應，「仲係好怕街上見到啲人，唔知識唔識得我咁，唔知畀咩表情好⋯⋯」
做得區議員，必定要夠chur，相信喺荃灣 「愉景」選區撼低田北辰嘅候任議員劉卓裕（Adrian）完全qualified。
同阿哥年紀相差8年，一直備受呵護。劉卓裕提供相片
曹星如都係集郵對象。劉卓裕提供相片
邱誠武（右）都係荃灣聖芳濟中學舊生。
因工作關係，同到偶像林憶蓮近距離接觸。劉卓裕提供相片
曾經開過微博主打食評，但「阿卓卓」已經久未露面。
同吳彥祖咁親密，羡慕不少女生。劉卓裕提供相片