人稱「水哥」嘅恒生銀行（011）傳訊及企業責任總監張樹槐（Walter），10年來跑遍全球五大洲完成32項馬拉松紀錄嘅故事，報章雜誌不乏報道，演講亦聽唔少，佢最新嘅勵志故事，仲登陸埋擁有17萬會員嘅《少年警訊》，兩位90後小記親臨恒記寶號，訪問呢位長跑達人。
水哥語重心長，透過《警訊》勉勵年輕一代學習馬拉松精神：唔好浪費機會，唔好睇小自己潛能，不重名次，只求挑戰自己。
已將馬拉松運動視為一種「境界」嘅水哥，喺四十不惑之年無心插柳下，展開長跑之旅，多年來唔單止完成長達1500公里嘅總路程，仲感染埋同事朋友親人加入馬拉松行列，最難得係原本不愛跑步嘅囝囝，亦以父親為榜樣，最近仲父子兵上陣，完成海洋公園慈善跑。