太陽娛樂集團老闆周焯華（洗米華）噚晚同陀B六個月嘅大婆陳慧玲喺澳門出席新戲《賭城風雲II》首映禮，洗米嫂透露新年一家人會外遊度假，不過洗米華成程木冇表情，見到記者即速閃，唔知係唔係早前同MandyLieu去散心，搞到個人分晒心(新聞連結：　 http://bit.ly/1EWW4WI　 )。

據知洗米華早前已決定今年將賭業拓展去柬埔寨，今日有雜誌報道指，洗米華上周三飛咗去金邊開會，唔見咗人成兩個月，原來係搵埋早排匿埋新加坡安胎嘅MandyLieu一齊過去處理公事，之後，洗米華為咗多啲陪MandyLieu，仲齊齊飛去曼谷提早過情人節。

該報道影到上周六，大肚嘅MandyLieu同洗米華步出曼谷機場，陀B六個月嘅MandyLieu明顯有啲浮腫，唔知係唔係機場比較人多，洗米華都好小心保護MandyLieu，怕佢被人撞到。

一行咗出機場，洗米華即刻煙癮起，唔想MandyLieu吸二手煙，叫女方先上車，自己行埋一邊扯煙。報道指上年聖誕，洗米華一家都係去泰國，當時大婆陳慧玲喺隔籬，洗米華都照扯煙，男方似乎對MandyLieu特別細心，亦同MandyLieu住番上次同大婆一家五口住過嘅SiamKempinski總統套房。

該報道又話，Mandy同洗米華先返酒店休息，晚上六點先出動撐枱腳，身穿背心短裙嘅Mandy明顯產前水腫，唔止現出巨肚，連手腳都腫晒，不過MandyLieu一於懶理，難得獨佔情郎，不時主動攬住洗米華，唔知係唔係身在異地，今次又冇保鑣保護，周焯華又要照顧粗身大細嘅MandyLieu，又要不時留意身邊有冇港人認到佢，認真夠晒忙，佢哋食到十點幾，就一齊返酒店。報道形容二人返酒店期間，不時打情罵俏，洗米華想伸手蹺女友，但MandyLieu就好鬼馬咁閃開，二人喺走廊互相拉手，不知幾sweet；反而噚日對住大婆就完全零交流，冇咩表情。