美國總統特朗普（Donald Trump）頒佈行政命令，停止美國接收難民及禁止七個穆斯林國家旅客入境，包括敍利亞、伊朗、伊拉克、利比亞、索馬里、蘇丹及也門。而憑《The Salesman》入圍奧斯卡最佳外語片嘅伊朗導演阿斯加法哈迪（Asghar Farhadi）亦受禁令影響，令佢或被禁入境。

阿斯加法哈迪今日發聲明宣佈將不會出席香港時間下月27日於洛杉磯舉行嘅奧斯卡頒獎禮，佢表示即使特朗普頒佈如此不公平嘅命令，佢本來亦打算出席，想就此機會向美國傳媒表達佢嘅睇法，亦冇打算要杯葛奧斯卡。
不過由於太多變數，就算佢成為例外順利入境，佢都係覺得唔能夠接受。阿斯加法哈迪喺聲明中發表佢對此事睇法，認為世界各地嘅強硬派嘅世界觀都係一樣，去了解世界只係得一個方法，就係分「我們」同「他們」，去製造一個可怕嘅「他們」形象，去讓國民感到害怕。佢指出伊朗嘅強硬派同美國都係一樣。
阿斯加法哈迪亦表示：「但係，我相信這地球上人類之間依然有好多共通點。」佢希望現時嘅處境唔會令國家與國家之間更加分裂。