甫上任就因為「奸商論」而出晒位嘅商務及經濟發展局局長劉吳惠蘭，前日出席民建聯中小企座談會時又語出驚人，公開呼籲老闆唔好裁員，只要減員工一半人工就得，僱員勒緊褲頭，同僱主共度時艱云云。據講在場中小企老闆聞言後直斥局長黐線，八方聽到劉吳局長咁講都嚇一跳，高官公然叫老闆減夥計人工，呢啲高官，都算人間極品。

劉吳局長做咗大半世公務員，長期捧住個鐵飯碗，薪高糧準年年有人工加，根本唔知減薪係乜嘢滋味，可能真係唔知道打工仔家陣有幾閉翳，好多人朝不保夕搵朝唔得晚，局長居然叫人減薪保住份工，咁口臭唔俾人鬧至奇！有工會領袖私下同八方講，就算局長出於好意，都係講嘢唔經大腦，正一是但噏發花癲。劉吳局長噚日補鑊，強調唔係提倡僱主減薪，只係鼓勵老闆同僱員要同舟共濟啫。
工聯會議員王國興慨嘆，官員真係不知民間疾苦，「如果老闆真係同夥計講減一半人工，咪即係炒人？減一半人工點做呀！」佢又話現時已有酒樓九折支薪，月入幾千蚊嘅打工仔，真係越嚟越難捱，佢警告僱主唔好聽到局長亂講，就真係向工人開刀，因為隨便減薪可能觸犯僱傭條例。
八方聽聞官場中人對劉吳局長「減薪論」都聽到O晒嘴，勞工事務應該係另一個局長張建宗負責，劉吳惠蘭越俎代庖叻唔切開聲，真正添煩添亂。有人講笑話煲呔同局長開「早禱會」時，應該督促吓啲臭口局長開少句聲當幫忙。香港人人有言論自由，既然局長認為逢商必奸，局長叫奸商剝削員工利益又有乜咁出奇？最好日後佢記得袋住一大包臭丸出街，每次講嘢前啪番粒，等市民唔使咁難頂就算啦。

話得說回來，減薪共度時艱唔係唔得，不過最應該減人工嘅唔係一般打工仔，而係廢話連篇嘅高官，八方公開呼籲劉吳惠蘭請求特首煲呔，同其他局長、副局長、政治助理，根據佢建議全體五折支薪，每年慳番幾千萬元公帑，咁就真正同廣大市民共度時艱嘞。高官減薪有先例，03年老董宣佈同問責局長一齊減薪紓緩財赤，既然多個副局長、政治助理都話唔係為咗高薪而加入政府，聽劉吳局長話，勒緊褲頭打工都冇所謂啦。
mailto:[email protected]