上個星期寫過另類測市系列上集，有朋友留言，覺得散子好似呃咗佢地個Hit Rate，唔好意思，上一篇散子的確只係顧字數唔好爆太多，無解釋清楚呢個「另類」係有派膠成份，所以專登今次寫下集嘅時候，第一段就講清楚，仲有，由於上一篇太長，增加咗編輯工作量，所以今次散子亦會簡短啲。

輪到今次係香港版，不得不提嘅係丁蟹效應，傳說中，每次秋官有新劇，個市就會冧，呢個傳說，除咗傳媒不時拎出嚟重溫之外，大行里昂（今日中信里昂）亦都曾經出過報告，秋官自己亦都出嚟回應過，係效應定純巧合，但往績準繩率超過50%，缺點：秋官同李嘉誠一樣都係人，都會有退休嘅一日。

沈大師明燈效應，事緣於大時代之後，大師持續睇好，但個市就持續向下，就係呢啲一連串嘅「手風唔順」，造就咗大師有呢個效應，缺點係，大師近期睇騰訊非常準確，要同大師對賭都唔係咁易。

蘋果A1，呢個係蘋果流傳嘅一個傳說，每一次蘋果用股市做A1，如果係股市大跌嘅，第二日股市就會有反彈，反之亦然，缺點係，蘋果唔係成日用股市做A1。最後一個，亦都係散子個人認為最準，基本上會專登留意嘅一個指標，就係GYM房師奶講股，股市走勢平穩向上，基本上唔會聽到，直到聽到佢地「偉論」嘅時候，基本上就一定要走，對上一次散子聽到師奶GYM房講股，就係今個月頭。

最後都要補返句，以上嘅效應或非傳統指標，並無科學根據，只係市場流傳及個人經驗，投資者請勿基於上述因素作出任何投資決定。

散子

全球樓行 Dream House零距離
https://hk.feature.appledaily.com/overseasproperty