由宋仲基同宋慧喬主演嘅神劇《太陽的後裔》雖然已於4月播畢，不過《太陽》熱潮依然好勁，當初《太陽》勁爆紅時，已有指會開拍內地版。

而喺上周五一套內地劇《特勤精英》就低調開拍，內地網就盛傳呢部就係內地版《太陽》，據知呢部劇籌備咗兩年時間，現時開拍就食正《太陽》熱潮，故事嘅人物設定都同《太陽》差唔多，都係軍人配醫生，不過今次男主角就唔係特種部隊，而變成消防員，而網上公佈嘅名單就有洪欣老公張丹峰、女星蘇青主演，另外有指男二由包貝爾擔任，不過包貝爾自己已喺微博否認其事。

雖然未知呢部係唔係真係內地版嘅《太陽》，但網民就已經群起炮轟，事關「國民老公」只有宋仲基一人，加上《太陽》咁經典，好難有第二部可以取代，網民都留言話：「丟臉」、「拒睇」、「原來係喜劇片」、「excuseme？開玩笑嗎？」