趙世曾兒子丨趙式浩拒做花心「二世祖」 無懼百億家族爭產：神自有安排

蘋果日報 2020/12/23 16:50

趙式浩趙世曾廖康如結婚生仔二世祖
    83歲的百億富豪趙世曾風流大半生，但抱不婚主義，三個子女式芝、式浩和式正分別跟不同女友所生。長子趙式浩（Howard）曾被指遺傳爸爸風流個性，未夠30歲已與前女友Winnie Liu未婚誕下一子，日前Howard接受《蘋果》專訪，笑言：「出世第一日開始，我嘅原罪就係花心。」
    爸爸多姿多采的私生活，作為兒子不敢評論太多，但Howard認為外界對趙世曾有太多誤解：「成日聽到人話有錢佬咩咩咩，但其實佢後生時好勤力打拼，辛酸唔通同你講咩。我覺得結唔結婚睇個人性格，對小朋友嚟講，當然想有完整家庭，但我都寧願要一個單親家庭，好過要見二媽、三媽、四媽，甚至對薄公堂。自己年紀大咗，睇番都啱，既然佢唔想定，就不如唔好定，投契就一齊，冇人攞刀行住你，想有小朋友就有小朋友，不負於另一半。」
    數數手指，其實跟Howard傳過緋聞的女子不超過5個，一段還一段，沒有重叠。今年他決心定下來，跟NowTV的新聞小花廖康如奉子成婚，再誕一子，認為是人生必經階段。Howard透露二人在活動上認識，太太是政治版記者，接觸很多商界名人，思想比同齡女仔成熟，而且是個工作狂，他說：「冇叫佢唔好做，因為唔做嘢會同社會脫節。佢係政治版，去年社會運動都有落實地採訪，出過事，危險㗎，當時有同佢嘈過好多次，但冷靜落嚟，明白佢係熱愛呢份工，做到一個中立而且專業嘅記者。講真做傳媒人工唔係特別高，起碼今日唔需要靠份糧支撐屋企，鍾意就繼續做，唔鍾意都有好多選擇。」

    讀書時期打工賺零用

    新婚妻沒有叠埋心水做豪門少奶，Howard亦非大眾想像的「離地」富豪第三代，笑言：「可能趙生（指自己）想做都做唔到二世祖呢，哈哈！」Howard自幼跟爸爸生活，但趙世曾對兒子管教嚴，大學時已開始打工賺零用錢，「屋企好push我哋，唔係細個就可以『䟴䟴腳』，喺外國讀書時，屋企只會畀到基本生活費，要同朋友去旅行或食飯，就要自己打工，我都做過旅行社、銀行、補習社。男仔應該要硬淨啲，我大仔同個ex（前女友）一齊住，我都覺得佢應該要學習獨立啲。」
    Howard擁有房地產管理學碩士學位，畢業返港第二日，已被安排返工打理家族生意，「好記得嗰日係漁人碼頭開業日子，同老竇食完餐飯，就叫我聽日返工做乜做乜。兩年後叫我『生生性性』畀個董事你做，奉獻多啲，準時返工，但其實我好早㗎嘞，係佢個鐘校快咗15分鐘啫，對我哋好有要求。」2011年，Howard自言受馬雲一番說話影響，決心走出comfort zone自立門戶，創立帝皇資本，多年來做物業投資、併購、建築工程、室內設計等。他承認一開始是「靠父幹」，但現在生意基本已上軌道，他續說：「自己size嘅項目都handle到，我又唔係好似佢（爸爸）投個百幾二百億項目返嚟，都係做一啲併購舊樓或基金公司嘅生意，過程幾辛苦，但亦係好好嘅磨練。如果有一日爸爸想我返去（卓能）做多啲，或將來我將自己生意交畀下一代，總之呢段時間學到嘅都係無價。」現由家姐趙式芝承父業，成為卓能集團副執行主席兼執行董事，而Howard則是公司的非執行董事，問到可擔心未來有爭產糾紛？他輕描淡寫說：「神自有安排。」

    媽媽開Live㨘招牌

    今年初，Howard更開拓網上購物平台pandatvmall，主攻健康用品市場，早前找來媽媽、70年代女星盈盈（蔡珍妮）「復出」做直播，透露美國的小朋友已經長大，所以回流返港，並視Howard如「細佬」。相比地產生意，網購似乎只是「蚊型」項目，Howard卻有另一番見解：「可能你哋覺得由趙式浩講幾好笑，但我係幾反對大財團壟斷，現在好多大型嘅網上平台，其實上架宣傳費好貴，我都想幫到小商戶，又希望畀到客人信心；加上現在經濟環境咁差，如果維持到一個運作，亦可以幫到同事搵食，做到通贏局面。」開網購平台僅數月，據悉已有公司欲洽購，看來Howard也是看準時機出擊。
    採訪：嵐山
    攝、錄：葉君海、廖達燊
    empty
    趙式浩開拓網上購物平台。
    empty
    Howard自言受馬雲一番說話影響，決心走出「comfort zone」自立門戶。
    empty
    趙式浩表示試過連續20小時工作。
    empty
    趙式浩是船王趙從衍孫、百億富豪趙世曾的兒子，但沒有富豪三代架子。
    empty
    趙式浩自爆學生年代已經要出外打工賺零用錢。
    empty
    趙式浩找來媽媽盈盈「復出」，幫手推銷網上購物平台。（IG圖片）
    empty
    趙世曾是不婚主義，三個仔女分別由三個女朋友所生。（資料圖片）
    empty
    三姊弟感情不俗。（資料圖片）
    empty
    趙式浩今年成家立室，早前與太太跟爸爸趙世曾、媽媽盈盈和大仔一家人食飯，享天倫樂。（IG圖片）
    empty
    趙式浩透露大仔跟前女朋友生活，但仍不時與兒子見面一齊玩。（IG圖片）
    empty
    趙式浩與新聞小花趙康如誕下一子。（IG圖片）
    empty
    趙式浩認為男人終要成家立室，今年與NowTV新聞小花廖康如結婚。（IG圖片）
    empty
    今年5月，趙式浩與大肚廖康如跟前妻所生的大仔和爸爸一齊食晚飯。（資料圖片）
    empty
    趙式浩認為結婚生仔是人生必經階段，一家三口，幸福滿瀉。（相片由受訪者提供）
    empty
    爺爺趙世曾見到孫仔笑逐顏開。（相片由受訪者提供）
    empty
    趙式浩自幼跟住爸爸生活，從小已經好獨立。（相片由受訪者提供）
    empty
    趙式浩是趙世曾與70年代藝人盈盈所生的兒子。（相片由受訪者提供）
    empty
    Howard擁有房地產管理學碩士學位。（相片由受訪者提供）
    empty
    趙式浩在外國生活時，已經要出外打工賺零用錢，絕非一般少爺仔。（相片由受訪者提供）
    -----------------------------
    《蘋果》英文版免費試睇：了解更多
    英文版已登錄《蘋果》App，立即下載/ 更新：iOS / Android
    -----------------------------
    支持蘋果深度報道，深入社區，踢爆權貴，即Like蘋果專題及調查組FB專頁！