【職場慧眼】前度新上司（張慧敏）
蘋果日報 2020/03/31 16:00
職場張慧敏
何必為了一棵樹，忽視了整個森林
「我啱啱收到個唔係好開心的消息，我前度會嚟我公司做，仲要做我上司。當年佢揀咗女同事離我而去，我好傻咁喊咗出嚟仲傻到想辭職，冷靜咗落嚟後發現公司有一個空缺，膽粗粗同boss講希望佢考慮吓我，我會努力證明我可以勝任呢個位。Son姐，我擔心見返佢會影響我情緒同工作表現，謝謝Son姐！Btw，動物扮工室好好睇！」
妳真係好可愛！妳前度真係走寶，好似妳咁率直真性情嘅女仔去邊度搵？不過，即使當日佢拋棄妳，但係妳直到今日仲未放低呢段感情，妳心中依然有佢，咁就真係傻得交關！「棄我去者，昨日之日不可留；亂我心者，今日之日多煩憂。」聽我講，收拾心情，唔好再為一啲唔值得嘅人同埋唔值得嘅事，傷心難過。你又冇做錯到，點解要因為人哋嘅錯不斷懲罰自己，唔放過自己？
最佳最甜美嘅報復，係活得比佢好，見返妳個前度，記住唔可以比自己個心起漣漪波瀾，如果妳做唔到，證明妳個心仲未夠強大。把握機會，好好學習，如何令自己的心變得更堅定強壯。新官上任見到佢落落大方就好，大家嘅關係就係上司同個下屬嘅關係。見返佢，妳需要平常心，唔係亂晒自己個心。妳要是慌慌張張閃閃縮縮逃避面對佢，就是無私顯見私，落在其他同事眼內，只會為妳製造是非麻煩。
不過咁，佢嘅入職能夠激發起妳嘅上進心去爭取，呢啖氣呢團火用之得法，爭氣起來燃燒起來真係唔講得笑，妳真正應該多得佢唔少！
無論如何，過去了的就讓它過去，感情是從來難分對錯，何必為了一棵樹，忽視了整個森林？妳嘅反應證明妳心中依然有佢，日日起身對住塊鏡大大聲同自己講，我嘅幸福我嘅快樂由我話事，我值得更好，YEAH！