當年今日
關於我們

【聰明啊!】大陸限制軍方電影之時 香港推《紅海行動》角逐奧斯卡

蘋果日報 2018/09/25 17:05

香港電影製片家協會奧斯卡最佳外語片紅海行動

噚日「香港電影製片家協會」公佈,從最後入圍嘅七部電影包括《奇門遁甲》、《紅海行動》、《捉妖記2》、《黃金兄弟》、《棟篤特工》、《藍天白雲》同《中英街1號》中,選出《紅海行動》代表香港參加角逐奧斯卡「最佳外語片」。
事件引嚟外界討論及批評,普遍聲音都質疑《紅海行動》點解可以代表香港,因為部戲嘅演員同故事內容都同香港毫無關係,只不過英皇有份投,導演林超賢係香港人,掛名叫合拍片,但實際就係一部大陸軍人題材戲。而據香港影業協會主席洪祖星接受《蘋果》訪問表示:「《紅海行動》嘅攝影、劇本、導演同埋製片人都係香港人,最緊要出品公司係香港資金,所以係合乎資格。」
據知,其實主投呢部戲嘅博納公司,係想爭取代表大陸參加奧斯卡嘅,但係大陸一般會揀番內地導演拍嘅戲,極少用港台導演拍嘅作品代表出賽,結果選咗文晏執導嘅《嘉年華》,部戲曾為佢帶來金馬獎最佳導演獎。
再加上早前有傳官方不滿軍方控制娛樂圈,早已發出「禁軍令」,限制有軍方背景的公司及電影。而《紅海行動》及《戰狼2》亦被官方內部批評鼓吹軍事主義,最終令國家樹敵;而《嘉年華》係一部講小學女童遭到性侵、引發一系列反映中國社會醜態嘅故事,因為中國兒童受虐案件實在太多,大陸官方開始關注,所以揀呢部戲參賽好正路。
其實好似《一念無明》等真實反映社會問題嘅電影,近年都係奧斯卡最佳外語電影得主嘅主軸,好似17年智利電影《不思議女人》就係講緊一個跨性別人士面對嘅社會問題,呢一類電影往往都冇大爆破、飛車、3D特效等「視覺元素」,反而會著墨喺劇情、角色描寫等電影最基本元素上。
相反,沒有自己軍隊只有駐軍嘅香港,就揀咗《紅海行動》代表香港,據知唔少電影業內人士都對《紅海行動》代表香港參選奧斯卡唔太樂觀,唔少影人私底下都取笑呢個以老闆為首嘅電影製片家協會有冇「押錯注」。部份人士認為,既然香港點都好難入圍或得獎,不如做個「順水人情」將一部軍事片推出去咁啦。
不過講真,《紅海行動》呢類片種贏面唔會大,因為美國自己都拍一大堆軍事片,好難拍贏佢哋,所以揀冷門題材片會較有勝算。好似日本以《小偷家族》做代表,台灣就以《大佛普拉斯》代表,相信日本嘅《小》片入選呼聲會比較高。
要講劇情,其實香港電影一啲都唔差,今年就有喺金像獎表現出色嘅《黃金花》,以自閉症及香港屋邨做主題,望落似乎亦不失為可以代表香港嘅電影之一,不過喺香港揀電影參選嘅成員眼中,似乎《黃金花》連入圍資格都冇。

精選娛聞,喺晒《娛果》
http://fb.com/appledailyent