月薪421,396蚊嘅梁振英，上任後經常放大假，份工筍過你同我。特首辦回覆立法會嘅文件顯示，狼英2012年7月1日上任以來嘅20個月，請大假5次，即係平均每4個月就放1次假。三任特首中，狼英平均每年放最多假，超過14日。

平均每年放14.1日假

馮檢基要求特首辦交代三任特首嘅放假次數同埋日數。回覆嘅資料顯示，董建華上場7年半，放假一共59.5日，平均每年放唔夠8日。曾蔭權上任7年，放咗89.5日，平均每年大假12.8日。放假最多嘅係狼英，上任短短一年半，放假達23.5日，平均每年大假14.1日，勁過晒董建華同曾蔭權。
狼英上任後，足足去咗21次外訪，一如所料，19次都係「返大陸」，最多就係去北京同廣州，餘下兩次去咗美國同印尼。
狼英拒絕交代每年約80萬嘅酬酢津貼開支詳情，原因係「津貼非實報實銷」，乜佢唔係成日話「接受市民監察」、「開誠布公」嘅咩，大拿拿近100萬公帑點使就拒絕公佈。各位，下個月又要報稅喇！