由日本人氣女星桐谷美玲代言嘅Y!mobile搞作多多，今年先後搵嚟80年代大熱嘅不良貓、昔日偶像早見優等合作唔同版本廣告，最近都趕及熱潮拍攝洗腦歌《PPAP》版全新廣告。

桐谷美玲穿上豹紋衫，孖住PIKO太郎拍攝Y!mobile嘅冬季喵喵罐推廣短片，用喵星人同鐵罐代替Pen-Pineapple-Apple-Pen，廣告今日正式出街，廣告商方面更炮製唔同版本，包括喵星人版本嘅PPPA。

由諧星古坂大魔王化身嘅豹紋大叔PIKO太郎憑PPAP賺到笑，MV近日除喺YouTube衝破1億次點擊之外，連米倉涼子主演嘅超高收視人氣劇《Doctor-X》都請PIKO太郎客串下星期嘅大結局。