港股噚日勁升180點，重上15200水平，收報15218，但成交只得184.65億元，似係超賣後的技術反彈多過完成調整。噚日大市主要由中移動（941）、中海油（883）同埋本周四公布業績的長和系帶動。
文化傳信（343）宣布計劃配售6.6億份認股證，每份作價0.038元，集資2500萬元，行使價0.172元，每股總行使成本0.21元。文傳噚日復牌後，股價踢高6%至0.213元，成交金額達1353萬元。
文傳現價高過每股總行使成本1.43%，應可以加快股證的去貨速度，不過當股證配晒出街後，相信會有人沽正股，轉而持股證，文傳股價或出現震盪。
油價急升，但中石油（857）並冇跟住升，收報6.30元，冇起跌。市場除擔心股神畢菲特沽貨外，中石油亦可能配股集資。中石油母公司提出以41.8億美元（326億港元）全購哈薩克斯坦石油公司，雖然呢單交易由母公司進行，但據講中石油亦有份出資參與收購。
另外，聯交所資料顯示，摩根大通上周三減持中石油H股至低於5%，唔知摩通會否再沽？但由於持股已少於5%，再沽都唔使見光。