貝安琪(Ankie)同外籍未婚夫Simon van Damme、陳志雲、趙世曾同女伴等，噚晚喺灣仔演藝學院欣賞舞台劇《喜劇甩轆王》，Ankie未婚夫表現得怕怕醜醜，影完合照就急急跑開，Ankie笑佢好怕醜，問佢哋係咪成日撇低囝囝二人世界？Ankie話：「今次係囝囝出世7個月第3次，今晚有保母睇住，都有少少唔捨得，平時做嘢都有人照顧，陪住囝囝。」

問佢哋有冇諗過一家三口拍廣告搵銀？Ankie就話：「之前幫本親子雜誌影封面，拍廣告我都唔介意，阿仔好鍾意影相，識擺甫士。」會唔會培養佢做明星？Ankie話：「佢自己揀，佢想嘅我唔反對，學演戲對出嚟做事有幫助，同人溝通都好啲，對每個人都好。」至於問到佢哋婚禮籌備成點？Ankie就話決定喺明年搞，會揀喺外地，不過都會返香港補擺喜酒。