台灣組合F.I.R.（飛兒樂團）前女主唱飛（Faye），條命似乎真係苦咗啲。

今年2月，佢突然於社交網爆出驚人消息———「我已是局外人。三人正式解散。」指的是F.I.R.已經唔關佢事。令人詫異係連Faye都唔知自己俾人踢出局：「這兩天有許多人轉貼給我看才知道，原來團要出新歌了！後來上了專頁才發現我已經在2/16被移除管理員資格了。」新歌同新計劃，都係冇預Faye份。

但識大體嘅Faye，反過來安慰大家：「沒關係，雖然我已是局外人，但過去三人一起努力的成果，都願意與彼此分享，這是我愛F.I.R.的方式。」（新聞連結：　 https://bit.ly/2HM6MbA ）

噚日，Faye又爆出驚人消息：分手了，還說，「所拖（託）非人」。

5個月戀情，就這樣畫上句號。

37歲嘅Faye，男友是大陸漫畫家陸明。五個月前，兩人喺內蒙古冰天雪地（攝氏零下29度）拍攝新歌《蒼穹》MV時，細過Faye一年嘅陸明擔任視覺設計，仲有份參演一角。可能因為冰天雪地，Faye又被陸明才情吸引，兩人相處三日已擦出愛火。及後Faye亦大方向友人坦承戀情，被戲稱「冰雪奇緣」。估唔到依家咁快分手。

Faye噚日喺微博寫道：「所拖（託）非人，一場誤會，我和陸明分手了，謝謝大家曾經的祝福，不需要問原因，也不需要多說，我還好，只是有點心悸，沒有太傷心，現在還好，未來會更好。」歌迷​紛紛留言安慰，說：「他走了帶不走你的天堂」、「他本身就跟你不適合」。

Faye嘅感情世界一向低調，曾與F.I.R.阿沁相戀三年，2010年分手，阿沁2014年同女模花花結婚，育有兩女。