【新增動新聞】

主角又係基斯坦奴朗拿度（C朗）？悶唔悶啲呀！周五世盃外歐洲區B組，葡萄牙作客拉脫維亞憑C朗梅開二度，加埋波圖21歲射手米基爾施華埋齋大勝3:0，為下周開打嘅洲際國家盃壯行色之餘，賽後6戰15分續居次席，落後同日作客2:0淨勝法羅群島、6戰全勝嘅榜首瑞士3分。

為皇家馬德里稱霸歐聯後飛咗新髮型嘅C朗似乎真係好意「頭」，上、下半場輕輕鬆鬆近門頭槌梅開二度，更難得係佢喺67分鐘並冇貪功，傳畀米基爾施華射入空門湊成3:0大勝。領軍大勝一場，C朗梗係心情靚，臨完場前有位小球迷衝出場攬住佢，C朗笑笑口之餘仲一齊自拍，好有愛！如果球迷仲係嫌悶，不妨記多一個人名：米基爾施華，計埋今場入波，佢過去7次代表葡萄牙上陣就射入7球，洲際盃對手唔好以為葡軍仲係C朗一人球隊啦！