自反修例運動爆發以嚟，差人濫暴，而且心態好有問題，好似前線不斷指罵示威者係曱甴，即使警方承認咁講唔理想，但從來冇停過，最近仲連喺現場嘅無辜市民都俾差人鬧係曱甴。一班左到上腦嘅建制派亦跟風叫市民做曱甴，好似新民黨喺南區海怡西競逐連任嘅陳家珮，上星期出席建制派靜默遊行其間竟然鬧批評佢哋遊行係垃圾嘅市民做曱甴還擊，佢以為冇乜人知，點知有海怡街坊噚日走去搵佢理論，鬧佢做乜叫香港人做曱甴，陳家珮唔夠人講，就走咗去唔理人！

稱衝口而出　有權發洩

有讀者畀咗條片八方，見到陳家珮噚日朝早係海怡西商場外聯同海怡東候選人林啟暉擺街站，呢個時候有女街坊走去質問陳家珮，係咪公開稱呼過香港人做曱甴，起初陳家珮想否認，之後又話「有垃圾先有曱甴」，呢個時候街坊火都嚟埋，大鬧陳：「你配唔配選議員呀，由你把口講㗎，你係垃圾你先講得出口㗎，公然叫香港人曱甴（嘅人）去選議員，離晒譜㗎！」

呢個時候陳家珮叫女街坊唔好對號入座，原本想走嘅女街坊即時嬲到返轉頭，再質問陳家珮認唔認有講過香港人係曱甴？陳家珮就立即喺義工陪同下敗走，但又邊走邊講話「有」。

陳家珮同八方講，噚日朝早佢三度俾居民狙擊，原來有居民噚日拎朝早警員開槍相質問佢係咪支持，佢認為唔知道事件前因後果難以判斷，但又話正常市民返工返學警察唔會無端端開槍喎；至於佢會唔會收返曱甴言論？佢學埋差人話有關稱呼唔理想，又話唯一要致歉嘅係喺建制派靜默遊行時冇保持靜默，自言受暴力新聞困擾，所以衝口而出，但又話自己對示威者行為好嬲，示威者有權縱火，佢都權發洩吓啩！即係唔認錯喇！

李八方