靚仔騎師Derek梁家俊新憑「美麗傳承」於香港一哩錦標一放到底，策騎生涯首次勇奪一級賽冠軍。呢位準爸爸事業取得大突破，即時成為馬場大紅人。

明晚（13日）於谷中騎八場，下期（17日）沙田日馬亦一早落實有10匹座騎，以往馬迷同馬主可能有錯覺，認為外籍大騎師騎功總勝過本地薑一籌，惟本地騎師今季表現突出，呢個觀念已經改變，甚至倒番轉，連洋將都感受到華將嘅氣勢，感到有壓力。

好似今季重臨香港客串的巴度，在上月15日晚於谷草起孖後，差唔多食足一個月白果，當然心急想破悶局，巴度同好多華將一樣可以造到輕磅，佢亦慨嘆話要搵座騎好困難，能夠出策具爭勝機會嘅賽駒更加難。

巴度呢期得五場賽事有份跑，座騎數目唔算多，但除咗「妙感」排稍外嘅8檔後，其餘四駒都抽到中或內檔，對跑窄場自然有幫助。

其中第六場三班1650米「威信」抽到3檔，隻馬跑田草經常只衝一段仔，但往往只跑得接近而好難出頭，今次有兩大改動，除咗初次渡江同增角逐1650米外，巴度上場跑完後，已向沈集成建議為馬兒配戴頭罩上陣。

佢話：「個人覺得『威信』太易緊張同細膽，有時候會懼怕馬群，既然佢晨操都戴開頭罩，而且表現較放鬆自在，索性用埋呢個配備出賽，如果佢真係可以放鬆到，『威信』於目前評分好有惡氣。」

上星期二（5日）係巴度26歲生日，當日晨操完一返騎師宿舍，其超索女友Eva立即送上生日禮物，然後仲喺網上發表「愛的宣言」，指彼此拍拖六年，巴度係世上唯一令自己流露出真性情的男人，全世界只得巴度一個人令自己有呢種火花四濺的感覺，真係肉麻到震！

明晚男友有馬贏的話，Eva隨時於凱旋門同巴度起勢kiss kiss慶祝。