雲達對拜仁、曼聯對利記、皇馬對巴塞，五五波格局，主客和、大細開邊樣都得！如果真係對自己嘅眼光咁有信心，祝各位好運，唔好損手而回。
周中，愛隊車仔對巴塞，純粹因為係球迷，點都要支持下，估主勝兼開大，好彩打個和。不過，經過賽後檢討，我呢個行為，完全喪失理智，雖然感性上覺得會贏，但係睇場波，點都係和波格，甚至有權客勝，入球大細都有機會，瞓身支持的話，輸贏事小，心臟頂唔順事大！

所以，一開始提嗰3場波，我一定唔會沾手！以波論波，周中歐冠盃，以上3隊主隊表現較佳，特別係曼聯，雖然朗尼有個獨食精隊友「C7」（基斯坦奴朗拿度），可能佢聽得神話多，以為自己變成傳說中嘅亞馬遜女戰士，一個打幾個，認為自己可以搞掂！好在，對住弱隊哥本哈根都算係贏波主場揚威，唔同佢計。
不過，如果朗尼再要拍住C朗同埋表現時好時壞嘅沙夏，對住紅軍真係會出事㗎！同時，雲達同皇馬，對手都係硬嘢，賽果難以預測，大家都係睇波算啦！
睇番啲熱門賽事，我鍾意愛華頓、維拉利爾同史浩克04主W；另外，我就瞓身支持愛隊華倫，實力始終「超班」，周日對奧沙辛拿，大家可以放心支持！
周鵬
商業1台《球迷集中贏》主持
電郵：[email protected]