呢個聖誕真難過，特別係煲呔同肥龍，下周三要表決政改方案，但係今個星期重要應付世貿會議，昅住班世界級嘅示威人士，以防俾人翻轉港島。八方聽聞，政府高層預咗聽日一定打得成，所以已經全面戒備，相信只有羅嘉瑞咁夠膽，叫晒班夥計周二返灣仔鷹君總部開會，當班示威者冇到。
肥龍推銷完政改，本周大條道理搞世貿，等煲呔自己執番檔攤，因為個政改方案由頭到尾都係煲呔傑作，佢當年向中央領導一定拍晒心口話掂，因為佢同肥龍一向都同民主派有偈傾、加上陳主教又屬友好、中央又信佢，點知會殺出四條A，搞到佢K俘都要輸。

只係做咗半個趙紫陽

君不見，Anson陳四萬一出場，聽講煲呔投晒降，人都謝咗，頭髮都少咗。不過，有高人就話其實陳太一出，反而幫咗煲呔；佢本來已經做咗趙紫陽，因為同情民主派，被中央打黑豬印，但係陳太企出嚟參加遊行，重話「見一步行一步」，咁就益晒煲呔啦；𠵱家佢只係做咗半個趙紫陽啫，方案唔通過，中央一定責怪，但係力度會細啲，因為怕畀機會陳太上位。
呢位高人咁講，其實梗係抬舉煲呔啦，佢好難同趙紫陽相提並論。但係喺中國官場，永遠都係寧左勿右，你煲呔話自己掂，班左派咪睇你表演囉；𠵱家唔掂，自然會有好多人拍晒手掌，大叫「都話咗煲呔老點啦」。
呢鋪大輸家一定係口口聲聲要搞強政勵治嘅特區政府，煲呔嘅智囊估計，如果只係讓區議員委任制可以分階段取消，個方案可以過到嘅機會不足一半。如果最後唔過，四方人士都冇損失，可謂「大四喜」，邊四方？咪土共、商界、北京同埋泛民囉。

扭轉乾坤機會接近零

但係陳太都講到明，煲呔可以順應民意，上京同胡溫為二十五萬港人請命，如果北京真係「以民為本」，畀個時間表煲呔，咁咪可以扭轉乾坤，反敗為勝。
可惜呢個機會接近零，因為聽講胡主席喺韓國已經話衰咗都會繼續支持煲呔，叫佢唔使驚。煲呔咁聽話，點敢要求上京面聖？嗱，𠵱家只有一線希望，就係中央出手，講個大時間表，原則性讓步，等民主派可以收貨，化險為夷。
喬曉陽話中央講時間表於法不合；舊年人大釋法，強行規定07/08冇普選，咁又合法咩？事在人為啫。


爆料熱線：29290000、27860099
報料傳真：26239278
報料電郵：[email protected]