韓國不時推出選秀綜藝節目，就好似《PRODUCE101》、《Show me the money》、《Kpop Star》等，畀有興趣入行演藝圈嘅人參加，而近日Mnet就推出新節目《高中生Rapper》畀想成為Rapper嘅高中生同場較量。雖然節目於上周五先開播，但當中16歲嘅男參賽者張龍俊就已經被睇高一線。

張龍俊外型唔錯，喺節目中亦有出色嘅表現，就連韓國知名Rapper歌手Swings都對佢好有興趣，打算簽佢加入自己嘅事務所，本來有大好前途，點知隔咗幾日張龍俊就爆出醜聞。根據韓國網民嘅貼文，尚未成年嘅張龍俊經常回覆留有暗示性交易嘅網友貼文，並露骨地寫住：「和Oppa做吧」，疑似約砲未成年少女，除此之外，張龍俊喺同朋友網上傾偈時，更叫朋友一齊去打自己媽媽，內容令人震驚不已。

事件爆光後，節目組對外表示張龍俊已經因個人原因退出節目，又指會盡量刪減張龍俊嘅鏡頭；至於張龍俊亦被網民搵出其父親係國會議員張濟元，隨後張濟元透過Instagram代囝囝向大眾道歉，聲稱因為囝囝係獨生子，未能好好理解囝囝對於音樂嘅熱情等等嘅道歉內容，不過就冇正面提到囝囝約砲一事，網民完全唔賣帳，之後張濟元就發表退黨聲明，表示會辭去自己喺黨內嘅職務。

而張龍俊今日亦公開親筆道歉信，寫道：「令咁多人失望受傷，真係好對唔住」、「我為自己講過嘅低級說話再次真心向大家道歉」，引發熱議。

喺韓國，未成年人嘅年齡係19歲，而根據韓國法例，如果同未成年人發生性行為，將以強姦罪論處，至少判處五年徒刑。