王灝兒(JW)、關楚耀同董嘉儀(LuLu)今日喺圓方出席「HKT Smart Living x VIVE Pro」發佈會，現場三個玩VR遊戲互相較量，自細打機嘅關楚耀有姿勢又有技術，輕易取勝，JW笑言媽咪係機痴，佢話：「細個時媽咪會夜晚打機，話要打爆機，係好得意嘅媽咪。」JW就怕同男友一齊打會拖累對方，所以多數係陪男友打機，身旁嘅關楚耀話有女朋友肯陪男友打機，令佢羡慕不已。

而JW嘅腸胃炎仲未好返晒，關楚耀就笑佢順便排毒瘦身，不過佢自己就相反，為咗5月個騷要增磅，問到會唔會騷肌？JW同LuLu好搞笑咁大嗌除衫，JW仲笑話：「唔係唔除呀？不過演唱會唔係要鬥大隻，佢已經好fit，期待佢唱歌。」關楚耀就話要咨詢吓大家意見先。

另外，王維基旗下香港電視確認唔會繼續申請本地免費電視節目服務牌照，曾經幫港視拍劇嘅關楚耀話：「拍劇已經係5年前嘅事，一路都申請唔到，王生咁聰明醒目，有其他發展都戥佢開心。唔申請當然係可惜嘅，廣大觀眾少咗個平台，希望可以繼續有興趣喺網上發展。」

精選娛聞，喺晒《娛果》
http://fb.com/appledailyent