我嘅愛隊曼聯，聖誕前後當「弗」，點知元旦日唔可以完成聖誕快車連贏四場，一顯威風，的確有啲美中不足。
曼聯今季人腳變動唔大，本來我諗住佢同上兩季一樣，都係陪跑，入到前4名攞番張歐聯入場券已有交代。點知佢哋愈踢愈好，𠵱家仲排響榜首，睇嚟只要keep住，就大有機會再成為英超冠軍。相信各位曼聯迷同我一樣，都好想快啲收「咧」，提早慶祝曼聯捧盃。

C朗拿度功不可沒

近期有咁好成績，除咗整體球員發揮得好之外，C朗拿度實在應該表揚一吓。佢雖然獨食到暈，因而錯失唔少入波機會；不過今季就嚟個180度轉變，踢法簡單直接，仲幫隊友製造唔少埋門機會，頻頻有波入。聖誕快車4場波，佢入咗6球，係曼聯贏波嘅主要功臣呀！
𠵱家我最驚有傷兵問題困擾，以曼聯嘅後備力量，要應付歐冠盃、足總盃等賽事真係唔多夠，要做番聯賽1哥，或者放棄其他錦標在所難免。佢嘅最大競爭對手車仔已經無前一兩季咁勁，快車期間連和3場失分，今季英超睇嚟要執執位喇！
WENDY
由歐國盃EuroBabes，變身球彩台受歡迎主持。