早前韓國男團GOT7個皇牌香港成員Jackson就被傳有意退出組合向內地發展，大部分粉絲都認為係流料一則，而Jackson方面亦冇回應，仲畀佢繼續主持內地版《拜托了冰箱》，Jackson更喺前日播出一集嘅《拜托了冰箱》入面公然話想飲台灣天王周杰倫老婆昆凌嘅母乳。

話說節目就公開咗昆凌屋企個雪櫃，期間節目主持人就講起母乳呢個問題，仲開始對昆凌嘅母乳展開討論。一向口沒遮攔嘅Jackson就一面興奮，問昆凌邊度有得買母乳，當得知市面上冇嘅時候Jackson就將個關注力集中喺昆凌度，對於昆凌冇帶母乳上節目仲覺得好可惜，話好想知道母乳係咩味，昆凌聽到之後本身應佢話：「應該真的不好喝。」但Jackson就好堅持咁講咗句：「沒事我也想一生能試一次。」搞到昆凌個樣勁尷尬。

而另一主持人亦都即時保護昆凌，對住Jackson講：「你試一次你找別人，你敢調戲大嫂。」Jackson繼續講唔停話無論係邊個嘅（母乳）都想試，仲話如果男主持人有（母乳）佢都想試，搞到全場嘉賓爆笑。