八九年六四期間被捕嘅湖南《瀏陽日報》前美術編輯、評論員喻東嶽，服刑十六年後今年二月獲釋，但牢獄日子令佢大受打擊，「無國界記者組織」話，佢被囚禁喺一個只得三平方米嘅地方最少半年，之後就患上嚴重精神病，𠵱家雖然出獄，但後遺症無窮，聽講佢連阿媽都唔識得，遭遇令人同情。
對香港人嚟講，喻東嶽唔算好出名嘅民運人士，但只要提起佢當年事迹，大家一定印象深刻。當年佢將油漆潑上天安門城牆毛澤東巨像，之後被拘捕，其後被法院以反革命宣傳煽動罪判處入獄二十年及喪失五年公民權利，前幾年獲減刑。
失去自由十幾年，又患上精神病，佢有幾淒涼可想而知，記協發起捐款運動，率先捐咗一萬港元畀佢，並呼籲行家或有心人幫手，可將捐款支票寄去記協（抬頭寫『香港記者協會』）轉交畀喻東嶽家人。地址係灣仔駱克道348-350號恆發商業大廈15樓A座，查詢可致電25910692。

傳真︰2623-9278
電郵︰[email protected]