「B餐」Kay早前宣佈暫別樂壇，專心照顧家人及休息一段時間，講到Kay將所有時間放晒家庭，老公張繼聰負擔加重，Kay即窩心稱快樂唔係來自物質，不過「A餐」徐濠縈(阿徐)似乎好享受潮人生活，噚日被報道爆佢去珠寶店一掃就掃成價值百萬元嘅鑽石鏈加耳環，估計成50卡，認真夠豪氣，冇辦法啦!佢老公Eason呢兩年搞巡唱，至少賺成3億，難怪老婆使錢咁豪氣。

今日有周刊爆「A餐」阿徐都好關心Eason嘅健康，話晒Eason都成42歲，仲擁有一個40吋巨腩，阿徐都想佢身體好啲，雖然老婆熱愛跑步，不過Eason4年前腳受過傷，o依家唔可以跑步，所以阿徐陪老公日行10公里，上周四被影到二人行去南灣再返壽臣山，當日天氣幾熱，Eason成程攰到爆兼有啲索氣，行行吓仲除咗條衫。

據報道指佢行到淺水灣撞到好友許志安，Eason即發揮吹神本色，同對方係咁傾，安仔仲伸手摸咗Eason個肚腩一下，安仔又揭開自己件衫晒一晒腹肌畀Eason睇。

早前一直傳Eason想阿徐生多一個，唔通咁努力做運動係想造人，周刊又指二人都冇刻意想生小朋友，據友人爆料，阿徐都係42歲，Eason又鬼仔性格冇話一定要追多個仔，而且囡囡康堤都11歲大，阿徐閒時都可以同囡囡傾吓時裝嘅嘢，都覺得好滿足，唔會刻意去追。

不過，「B餐」Kay就好想追生多一個小朋友，張繼聰仲講明想生個猴B女，Kay亦想嗱嗱臨趕喺40歲前生第二胎，而老公張繼聰都好配合，忙拍大台劇，亦抽時間跑步，平均一星期做四日運動，有時仲會叫埋阿Kay一齊跑，ready佢哋嘅生B大計。