日本男星竹內涼真最近人氣急升，在影視界搶手度有增無減，參演嘅人氣劇《過度保護的加穗子》，仲有靠晨早劇《雛鳥》吸納大批觀眾支持，令竹內涼真得以入屋躋身搶手貨之列。

竹內涼真夥拍高畑充希嘅NTV新劇《過度保護的加穗子》噚晚一集因電視台直播排球賽事，令劇集延遲45分鐘播出，影響呢一集收視下跌至9.9%。竹內涼真拍完《過度保護的加穗子》暫時冇得休息，更打鐵趁熱接拍TBS電視台下月開播新劇《陸王》，拍住影帝役所廣司及人氣男星山崎賢人合作。

《陸王》改編自《半澤直樹》、《下町火箭》作家池井戶潤嘅同名小說，TBS又係標榜《半澤直樹》班底，望以強勁陣容再取得驕人成績。竹內涼真曾參演劇集《下町火箭》，今次佢為《陸王》扮演長跑選手茂木裕人，而故事講述百年老店「KOHAZE屋」一直製造傳統足袋，可惜時代令生意不斷減少，改而靠開發馬拉松跑鞋得以翻身。

另外，竹內涼真有份參演嘅話題電影《帝一之國》早前於日本反應理想，由佢拍住菅田將暉、野村周平、間宮祥太朗、志尊淳同埋千葉雄大一班新世代男神合作，電影會於10月12日在港上映。