第二場四班草地1200米，「明目張膽」腳法有別於一般EncostaDeLago子嗣，出腳重心低，前腳出得直，呢類馬最啱跑乾快地，而且靠近內欄競跑，發揮會更理想。上季總場次697跑同程排五檔，沿途貼欄走，走勢相當順暢，可惜當晚大半條直路受困冇位出，最後幾十米望空，即如箭脫弦追趕對手，最終影相輸短馬頭，證明此駒跑短途的能力，四班絕對留唔住。翌仗遇上超慢步速，加上沿途走外叠蝕位，落敗不能作準。今次賽前操練積極，馬身肌肉有晒線條，狀態更勝上季入位時，四歲馬進度踏正軌，今仗開齋機會高。
「鴻圖戰士」上季尾跑同程，前中段連番受阻失位，仍能後上跑第五，壓倒今季在四班贏馬的「野孩子」及「連冠勇將」，反映居四班極具競爭力，今仗強配巫斯義，排檔理想，三甲機會樂觀。「精算率然」近兩仗戴眼罩，末段走勢更貫注，表現有進步，九月份安排三次試閘，備戰工夫相當辣，擺明車馬搏殺。「樂有贏」居四班佔上風，七歲老馬孭到133磅，位望較濃。