斥資逾千萬買入觀塘凱滙一個兩房單位的投資者孫小姐，對於成功揀樓感到興奮，她說「都開心，因為第一次啱啱推出黎，價錢都比較吸引，朝頭早就可以過到黎揀，梗係開心啦。」

孫小姐表示，仍未決定支付多少首期，不過見成交期約2年多，而且發展商提供一按八成都吸引，透露有意選用。由於孫小姐與丈夫二人手持多個投資物業，如工商舖、車位、住宅單位等，所以需要支付15%辣稅。

她認為樓盤在這個時期推出很難得，「覺得今次觀塘呢個盤難得，你點等，無咩機會等到啱啱係地鐵旁邊，同咁大型的屋苑，我覺得難得。」

她續指，因為樓盤地點吸引，交通配套、人流都好，所以睇好投資出租前景，「我地做投資最緊要租得出，果個地方有好多商廈、工廈，未來好易出租，潛力好！」

雖然近期樓市下行，但她仍抱樂觀態度，「我覺得都係調一調，個市日日都咁升，你反而唔敢入，因為覺得貴，而家都係回一回調，當然仲有機會跌，但係等到幾時呢？你無得咁啱係個最低位入，適合個位入，而且我哋長線投資，覺得ok，長遠都睇好樓市，但要小心啲揀。」

對於明年樓市走勢，她認為明年樓市平穩或者回調，因為中美貿易戰、加息及經濟等因素影響，仍有機會回調，預期調整期維持一年，因為香港人資金都充裕，料突破心理關口之後，他們又會湧出入市。而她自己表明日後如果搵到優質物業，都會考慮再入市。

問到如何儲到第一桶金投資，她憶述，自己15年前創業做商務中心，「啱啱沙士，好好彩果時入市做商務中心，果時成本唔係太高，好快2至3年就回本，開始有啲錢（投資）。」

記者：葉煜燊