大台今晚舉行頒獎禮，憑《是咁的，法官閣下》及節目《後生仔傾吓偈》等有份入圍唔同獎項嘅麥明詩，今日以一身粉紅色晚裝現身，都幾性感，佢話自己準備咗半個月，唔想自己太大壓力，但又可以畀觀眾見到一個唔同嘅形象。

被問到有冇信心攞獎，麥明詩話：「信心就唔敢講有，因為每個藝員同節目製作人員都係非常之用心咁製作，我覺得都係勢均力敵，好難講贏或輸嘅諗法。如果真係要揀一個，我希望可以憑《後生仔》攞到最佳拍檔，因為個人獎項，如果自己繼續努力的話， 可能過咗幾年、十年後會攞到，但拍檔獎係要遇到啱嘅拍檔、做到啱嘅節目，係天時地利人和，更加難得，我覺得呢個獎比啲個人獎更具意義。」不過麥明詩都明言係想攞獎，只係個目標係攞最佳拍檔或最佳非戲劇節目。

提到黃子恆偷食fans有手尾跟嗰單新聞（新聞連結： https://bit.ly/2PK7ncY ），麥明詩話有聽過，亦有睇報紙見到，但自己就唔會特別八卦其他人嘅私生活：「做演員最緊要做好自己啲戲，繼續努力學習，私底下方面，都係佢嘅自由。」講到該fans話大台冇罰黃子恆，麥明詩話：「我唔知公司有冇所謂嘅懲罰，呢啲都係公司高層內部嘅藝員管理方面嘅事情，我唔方便評論。」至於講到公司好似話加人工，麥明詩話：「我冇特別留意，加的話固然好，唔加都冇所謂，最緊要有機會做多啲好戲同節目。」

精選娛聞，喺晒《娛果》
http://fb.com/appledailyent