當年今日
關於我們

  泛藍轉軚快民建聯走得摩 - 李八方

蘋果日報 2003/11/27 00:00


台灣立法院今日投票表決公投法。中方對台辦張銘清例牌強硬警告,不過有記者問:解放軍是否已經有隨時作戰嘅準備,張銘清就話未聽過咁嘅消息。
中國本來諗住「以靜制動」,無謂好似一九九六年嗰次咁老襯,用軍事演習嚟同李總統登輝護航助選,點知始終都係唔襟激,特別係連泛藍軍嘅國民黨同親民黨,講到台灣安全,同民進黨團結一致,譴責中方軍事恐嚇,重要帶頭支持公投,中方就覺得事態嚴重。
國親兩黨,只贊成民主統一,更加憎惡大陸出動解放軍軍事上嘅「統一」,可惜台灣又冇一個民建聯台灣分部,可以幫中國分吓憂(不過就算有,又有幾多選票)?講到公投,連戰同宋楚瑜,同陳水扁李登輝玩埋一塊,咁又點會唔激到國家生蝦咁跳?
其實,公投未等於台獨,胡溫哋啱啱上台,梗係想以和為貴,胡溫哋一定唔想郁手,所以阿溫對於台灣公投修憲,冇話到「分裂祖國」,只係話「分裂祖國的挑釁活動」,即是話,未係埋牙打真軍,不過係調情熱身前奏。
大隻江向胡溫騷哥利
現時大隻江手握軍權。上海佬都唔係咁敢打仗,不過最近大隻江露面突趨活躍,張文康又已經另有重用,大隻江向胡溫騷哥利,大可將支槍攞出嚟,砰一聲,拍落枱面,借台灣嘅公投,嚟考吓胡溫,若然胡溫口震震少少,咁就係對捍衞國家領土完整立場動搖。
所以台灣佬玩公投,直頭係想撩到中國高層加劇權爭,甚至中央分裂,陳水扁同連戰哋,都咪話唔精靈。至於美國佬,至今講咗一句說話:「反對兩岸單方面改變現狀」。通過公投法,未算改變現狀,台灣正式宣布改國號,先至係改變現狀,但若果大陸方面刀槍攻台,咁就係改變現狀,到時美國佬若果冇反應,任由台灣「解放」,佢哋就冇得再認係全球大佬。大陸要面,太子仔布殊唔通唔要?
台灣佬自細就嚇大,所以連國親兩黨都要轉軚,由反公投改為飛身挺公投。估唔到孫國父中山手書嘅「天下為公」,原來係指台灣嘅藍綠天下,個個都要為公投而瞓身爭選票咁解。
民建聯如果學吓連戰又使乜玩辭職咁低莊,由反二○○七普選特首,明確宣布支持二○○七普選特首,並由曾鈺成出面拍心口,話上京搵曾慶紅傾掂佢,而中方亦畀番個彩自己友,從善如流,即開綠燈批准,明年立法會選舉,包保民建聯橫掃民主派。之不過,曾主席人在社團,有冇做人嘅自由意志?冇,就咪賴阿董陀衰自己個黨咯。


傳真︰2623-9278
電郵︰[email protected]