當年今日
關於我們

穿越劇定一條龍?《神鎗》驚見《巨輪》羅信記紙箱

蘋果日報 2013/09/27 06:00


無綫兩套重頭劇《神鎗狙擊》同《巨輪》每日播出都畀精明嘅高登仔玩搵錯處,前幾日已經搵咗唔少笑料出嚟,好似《巨輪》就背景明明係1980年,但又有一啲好現代嘅野。《神鎗狙擊》個廚房隻窗個鎖又喺外面咁。

而去到噚晚,網民又發現新嘢。喺噚晚嘅《神鎗狙擊》入面張兆輝去到Miki楊愛瑾間Café到同周海媚傾計,咁啱有人送咗箱貨畀Miki,個箱咁重張兆輝緊係幫手搬啦,當張兆輝一搬起個箱,竟然驚見紙箱上,印有竟然有《巨輪》入面蕭正楠間鋪羅信記嘅標誌!

一睇到呢幕,不禁深深令人懷疑——無綫面對經常畀人話佢是是旦旦嘅批評,其實唔係冇表示。雖然有理由相信,《巨輪》插入《神鎗》,係因為兩劇同時拍攝(《巨輪》2012年10月-2013年1月,《神鎗狙擊》就係2012年12月-2013年3月。)、《神鎗》嘅道具組手足一時貪就手而拎咗去用,但,亦可能係一場別有用心嘅安排——向波蘭電影大師奇斯洛夫斯基致敬。

因為大師經典作《藍‧白‧紅三部曲》裡面,都曾出現三片人物互相穿插情景。故此,《巨輪》嘅羅信記花生糖紙箱竟然落入《神鎗》周海媚間Café裡面,真係可能唔係意外,雖然,再講一次,兩劇係差唔多同一時間拍的。

嗱嗱嗱,有理由相信,無綫面對香港電視呢個勁敵,為求進步,所以向電影拍攝手法借鏡——準備好嚟緊嘅電視大戰。如果,你信嘅話。

而啲網民就討論話「TBB真係好環保。」、「其實係同一時空,兩班壞人係同一個集團黎,LaughingGor將佢嘅臥底經驗傳授俾陳展鵬。」何解?《巨輪》嘅陳展鵬,係警察;《神鎗》有LaughingGor謝天華,呀嘛。

其實兩套劇製作嘅時間非常近,連播出時間都夾到咁啱,李國麟先喺《巨輪》做陳展鵬老竇到《神鎗》再演徐子珊老爸——你話兩劇唔係互相穿插?冇人信囉。