雖然「山竹」襲港，但一班城中名人諸葛紫岐與老公薛嘉麟、鄧鉅明夫婦、張王幼倫一家、鄭詩韻與老公、林心兒及孫大倫一家等齊集於灣仔君悅酒店參加晚會。

諸葛被問到有冇做定啲防風措施，佢話：「屋企就貼咗膠紙，米字形，囝囝都知打風係咩一回事，不過屋企個菲律賓工人姐姐好慘，因為佢菲律賓個屋企受颱風影響，o依家同佢屋企人聯絡唔到，喊得好慘，我就叫佢唔好咁sad，諗嘢正面啲。」問佢家傭有冇同佢請假返菲律賓探家，諸葛話：「如果佢想返去都冇問題，不過都飛唔到啦！」

諸葛又話：「外面天氣好似好平靜冇乜嘢咁，唔知個風點，大家都要小心啲。」問到有冇去超巿掃貨？諸葛話：「有呀，噚日同工人姐姐落去買咗好多嘢。」薛嘉麟就指自己嘅工作都受到少少影響。

薛嘉麟爺爺薛志軒昨日設靈（新聞連結： https://bit.ly/2xf3gPt ），今早舉殯，薛嘉麟被問到家中長輩啲心情平復番未？薛嘉麟表示：「都OK嘅，（有冇慰問長輩？）我哋自己人都OK囉。」而薛嘉麟慶幸爺爺嘅喪禮同儀式都完成晒先打風：「個風撞正呢個日子，不過都好好彩。」諸葛另解釋番噚晚遲到原因，佢解釋話自己有事遲咗。

另外，同場嘅鄧鉅明透露原本打算今日入馬場，但因打風取消，佢話：「原本約咗朋友去馬場執番啲，o依家冇啦，其實喺香港馬場最開心，輸咗當做善事，贏咗當俾我放多啲錢喺銀行。不過o依家就會留喺屋企，因為我住西九嘅，樓下有幾間酒店，所以可以落樓下開餐。」問到佢會否趁機同老婆靜靜哋過二人世界？鄧鉅明笑言：「靜靜哋？我老婆問好多嘢㗎！聽日都會睇番啲WhatsApp、清吓啲報紙。」鄧鉅明仲講笑話，屋企樓下好多舖頭，佢老婆會帶佢落去行吓，試吓佢張信用卡用唔用到，不過鄧鉅明好有信心話：「放心啦，聽日啲鋪唔會開囉！」

精選娛聞，喺晒《娛果》
http://fb.com/appledailyent