財經專欄作家、以筆名方卓如行走江湖嘅龔耀輝（Ronald），由於要競逐今年立法會選舉會計界功能界別議席，噚日辭去中國金融租賃集團（2312）行政總裁兼執行董事，專心為嚟緊立法會選舉拉票，公司通告指佢嘅職務仲未搵到人接手，暫時由執董陳志鴻做住署理行政總裁先。
Ronald辭職唔難理解，事關04年佢亦有參選會計界功能界別議席，對手同樣係今年有參選嘅譚香文同陳茂波，當年Ronald輸個馬鼻得第三，今次捲土重來，不容有失，佢出書自揭方卓如身份都係為咗提高知名度。

棄15.3萬月薪

會計出身嘅Ronald舊年先放棄做咗十幾年嘅老本行，辭去均富會計職務，轉去中國金融租賃做CEO，華華記得當時佢出席公司記者會時，對新工作雄心勃勃，將公司轉名（前稱金豐21投資），業務亦由證券投資，轉型主攻中國金融租賃市場，估唔到家陣做唔夠1年就唔撈。
華華睇番中國金融租賃07年年報，由於Ronald10月先過檔，做得3個月，以月薪計袍金連薪津，1個月約15.3萬銀，同立法會出年嘅6.5萬蚊人工相比，真係差一大截，雖然話立法會議員有153.4萬銀實報實銷津貼，但都只係用嚟畀議員請助理同租辦事處，今次Ronald放棄一切擁抱立法會，仲未必得緊，佢都算好大勇氣，睇嚟政治真係有莫大嘅魔力。

電郵：mailto:[email protected]