近排新鴻基地產配股搞到全港地產股冧晒，但今日係母親節大日子，新地副主席郭炳江噚日接受電台訪問，除咗被迫要講配股，歌頌母愛就點都唔少得。
金融界好多人都認識郭老太──鄺肖卿，因為新地好多重要場合，郭老太都親身支持三個仔，好似舊年年尾，九龍站摩天大廈「環球貿易廣場」動土儀式，現場風大沙塵多，郭老太都親身出席，在場招呼賓客，難怪郭炳江話，母親對佢哋三兄弟影響好深。

咪以為郭氏三兄弟𠵱家長大成人，郭老太就唔使憂心，一向健談嘅郭炳江噚日自爆，曾經為咗業務問題，三兄弟喺公司閂埋門「開拖」（其實係嗌交啫），嘈到拆天，連門外嘅下屬都聽到，最後要勞動郭老太出面擺平。
講開媽媽，郭炳江簡直收唔到口，佢話有年由於耳仔出現問題要去日本做手術，郭老太陪佢留喺嗰邊足足八、九個月，「嗰時媽媽仲要顧住我喺香港嘅哥哥、細佬同個妹。」雖然佢同媽媽都唔識日文，但郭炳江話，喺日本嗰九個月，媽媽堅持日日去街市買餸煮飯畀佢食，你話母愛幾偉大呢。

今日係母親節大日子，全港最大地產商新地郭氏三兄弟會點同阿媽慶祝？郭炳江話，佢同大佬郭炳湘、細佬郭炳聯三兄弟今日會陪阿媽飲茶。大家有冇諗過有錢人同平民過母親節有乜唔同呢？分別可能就係，八方今朝晨早就要去酒樓等位，你認為新地郭氏三兄弟同阿媽飲茶使唔使等位吖嗱？
雖然讀者嘅母親同八方嘅媽媽一樣，朝朝都去飲早茶，但母親節咁重要嘅節日，同佢去間高貴啲嘅酒樓歎茶，母親大人起碼可以喺班師奶面前炫耀成個月。若然佳節過後，你阿媽淨係有份聽，冇份講……後果自負喇，所以郭炳江話，佢已經提醒自己班仔女：「喂，做嘢喇！」


爆料熱線：29290000、27860099
報料傳真：26239278
報料電郵：[email protected]