早排有大批騎師停賽，其中杜利萊及田泰安今晚齊齊復出，後者第二場騎「喜欣賞」畀雷神嘅「迎風起舞」擒咗只做二奶，估唔到第三場杜利萊即幫田泰安報仇，騎隻「精彩生輝」拉士拍住雷神座騎「黃金宅男」一齊發力追上，卒之影相險勝，破壞咗雷神嘅好事。杜利萊成功喺復出首戰即贏，補番早排停賽條數。至於佢嘅最佳拍檔高伯新，贏完國際賽之後連埋今晚「精彩生輝」在內，已經一口氣連勝四日共取六W。而今場「尊兄」閘前有問題，退出比賽。