賣地成績雖在預期之內，個價總算理想，多少可以刺激買家入市信心。好似尖沙嘴擎天半島，一名資深投資者覺得，樓市氣氛在賣地之後轉好，即時扑槌，買入一座高層，作價一千萬，逾千四呎，呎價近七千。
買家自住港島區，不過鍾情投資九龍新樓，買嚟長線收租，今次都唔例外，以市值月租三萬三計，有四厘回報，相當唔錯。
中原孫耀祖話，買家唔少收租物業，單係擎天，已有三個，包括年初用九百萬買入嘅兩個，𠵱家收緊租，回報五厘七同五厘。短短半年間，喺擎天投資咗千九萬，都算捧場。

炒家擬掃富臨軒
雖然話近排成交少咗，但投資者幾時都吼實個市，出擊入貨。
好似越秀投資薄扶林富臨軒，利嘉閣話，有個投資客，想用六千八萬，掃入尚餘十四伙，呎價五千六。
西半山區負責人楊建文話，呢位投資客買開港島物業，認為呢個盤有水位。
富臨軒有百二伙，尚餘十四個之中，有兩個頂樓相連戶。附近鴨脷洲深灣軒，第三座呎價成七千蚊，富臨軒同區貝沙灣，呎價八九千，唔怪得投資者睇起上嚟，覺得富臨軒應該有水位。
代理就話，呢個盤租務需求唔細，回報應有五厘。