早前推出Solo新歌《When The Wind Blows》嘅韓國女團少女時代成員允兒，近日就放假去咗奧地利維也納旅行，今日透過Instagram上載喺當地嘅近照，只見允兒一剪長髮，以爽朗短髮示人，令不少粉絲驚訝。而允兒似乎都玩得好開心，更舉手擺出V字手勢。

其實允兒早於上月中現身師妹團Red Velvet嘅演唱會時，已經被粉絲影到短髮模樣，而早前已經有不少女星短去招牌長髮，包括秀智、韓藝瑟、申敏兒等，唔通近期興短髮？

另外，曾與允兒合作劇集《權慾叛戰》嘅30歲男星池昌旭，現以現役陸軍身分於江原道白骨部隊服兵役，近日部隊方面就喺官網更新咗池昌旭及隊友嘅合照。開心舉V嘅池昌旭似乎未有因為辛苦嘅訓練而瘦咗，令粉絲大感安心。