狼英今次去北京述職，原本應該係例行公事，但係佢首先差啲喺人民大會堂門口「仆街」、之後又俾人話佢要急召蘇錦樑、張炳良、陳家強等三個「小官」北上「解畫」，狼英冇面之餘，更加成為官場、政圈茶餘飯後話題，好多人估「三個小官上北京」，究竟所為何事？
有官場好事之徒話，「三個小官」異口同聲話係預早安排，實際只係技術性否認，就算係狼英決定上京人選後，「被知會」要加碼帶埋「三個小官」去，官方都可以話係「預早安排」，問題係為乜一定要「三個小官上北京」？

據知官場、政圈意見紛紜，有說係狼英「唔熟書」，所以阿爺要佢帶埋三個「書僮」見部委；亦有人猜測狼英自知弱勢，帶多幾個「馬仔」上京以壯聲勢。
更有官場中人講笑，正患重感冒搞到就快「失聲」嘅食衞局局長高永文，冇喺十一黃金周後宣佈取消「限奶令」，狼英上京帶唔夠奶粉畀港澳辦主任王光亞個孫女，所以叫「三個小官托奶粉」上京，唔係王主任個孫仔邊夠奶粉食到開兩會，再等班港區人大政協幫佢帶奶粉上京？唔通又要王主任好似今年3月喺深圳見建制派咁，周圍再呻孫女冇奶粉？
講開王主任，佢噚日出港澳辦買嘢，俾留喺港澳辦外大街上嘅傳媒遇到，捉住佢做訪問，有人仲見到王主任拎住個紅色「背心袋」，仲話入面有雞蛋㖭，莫非佢親自去買餸？有政圈中人話喎，港澳辦主任喺京城內唔係好大嘅官，要自己去買餸有幾出奇？想當年佢去北京開會，就成日見到魯平「一支公」去買餸兼買日用品！

mailto:[email protected]

有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange