意大利籍騎師沈拿連贏兩期，人氣急升，贏馬固然開心，但最令不少馬迷留下印象嘅係一啲巨型冷門，都能夠俾佢搞得掂。

剛戰（18日）就有「醒目再臨」及「皇龍大將」分別由佢爆大冷勝出及上名，明晚（21日）佢胯下就有第六場四班1650米「駿協精英」，上場衝入季軍，位置派彩高達104蚊，今場估計仍是冷門。

睇番賽事片段，沈拿上場入到直路後，不斷喺內欄推騎「駿協精英」，完全冇停手，結果喺終點線前追過「萬里威揚」，呢席季軍唔係符碌，而係靠騎者努力不懈攞到。

沈拿話「駿協精英」可能因流過鼻血，陣上有時會有內閃毛病，自己喺前仗初次騎呢匹馬跑入第五名後，已諗到針對性策略應對。

上仗「駿協精英」殺入季軍，賽後何良立即卜定佢再騎，出戰今次第六場四班1650米，沈拿欣然應承。

「駿協精英」過往冇乜表現，但配上沈拿後大有起色，睇吓會唔會今場繼續交出成績，甚至贏埋，令騎者連贏三日。