唔係猛龍唔過江，呢句說話對有公司醫生之稱嘅韋理（BillWyllie）真係好啱，雖然後生一輩對佢唔係好認識，但行內前輩就肯定好熟悉呢個名，對佢喺香港同城中富豪交手嘅事迹，津津樂道。
嚟自澳洲嘅韋理，六四年出任夏巴汽車董事總經理，展開在香港二十幾年的工作生涯，七二年星資森那美收購夏巴汽車，佢手上嘅股權為佢帶嚟第一桶金。七五年獲滙豐邀請加入和記董事局，大刀闊斧精簡人手，結束虧損業務，兩年間令和記起死回生，仲將和記洋行同黃埔船塢合併為和記黃埔，後尾滙豐將和黃賣咗畀長實李嘉誠。
八一年佢離開和黃，之後佢同百利保聯手狙擊中巴，但未能如願。八四年向鷹君羅鷹石家族收購鷹君手上嘅富豪酒店逾三成股權，跟手就由羅家中人羅旭瑞買番，搞到羅家中人要同羅旭瑞劃清界線，最後羅旭瑞經營成功，同家人和好如初。

八七年韋理收購本港上市公司伊人置業，改名亞洲證券，成為上市公司揸fit人。另外，韋理同有狙擊手之稱嘅愛美高劉鑾雄爭奪華置控制權，結果落敗，只能成為第二大股東，仲因為華置係咁供股，佢終於沽晒啲華置股票離場。
韋理五十七歲突然宣布退休，原因係想有多啲時間陪老婆，後尾佢返回澳洲。喺臨走前，佢將石澳道二十號大班屋賣畀老牌廠家呂亞芳家族，但受石澳發展有限公司反對而告吹，其後搵信和黃志祥買，但因黃志祥已擁有十六號屋而賣唔成，最後以三千七百五十萬賣咗畀善美國際主席丁謂。九一年，韋理返澳洲接掌家族生意。昨日傳來消息，呢位公司醫生，最棘手嘅公司都醫得番，自己嘅癌病就醫唔好，終年七十三歲。
電郵地址：[email protected]