距離7.1大遊行仲有三日，聯同梁振英等左派人士發表「香港再出發」宣言嘅劉迺強，噚日接受港台訪問，繼續唔收口狂鬧香港人，指自己同班朋友覺得香港家「瓣瓣都唔掂」，尤其係班後生仔，香港長此下去一定冇前途。
中央要和諧，劉迺強鸚鵡學舌係佢個人自由，不過佢在大氣電波指罵全港700萬人只係識得鬧政府，訓示香港人要反省，相信好多香港人谷住道氣，連主持張寶華都頂佢唔順，反問佢有冇想過呢個宣言可能激起更多人7.1上街遊行。

遺臭萬年都唔錯

講到呢個問題，劉迺強變得更加興奮，似乎講中佢心聲，沾沾自喜，話有人咁抬舉令佢覺得「好榮幸」，又話不論呢個宣言令佢名留青史抑或遺臭萬年，佢都覺得唔錯，因為即使勁多人上街，「都解決唔到問題。」
做人想名留青史固之然好困難，遺臭萬年亦唔容易，劉迺強想藉一篇發噏風宣言史上留名，能否如願佢自己心中有數，佢話香港要再出發，八方亦呼籲大家7.1下午集合維園再出發，用行動話畀北京知，香港人爭取普選決心從冇動搖。
劉迺強噚日在電台左一句香港人只識鬧政府，右一句香港人冇承擔，又鬧傳媒一味批評政府，認為香港要多講和諧，否則會「失序」，同成龍「中國人要管」嘅奴才論互相呼應，但當主持問佢是否嫌香港太亂，劉迺強卻諸多辯駁，死撐「失去秩序，唔係叫做亂。」失序只係「冇方向」。

嫌北韓未算和諧

成龍認為香港太亂，好多人贊成將佢移送北韓，劉迺強可能唔想搬到咁遠，被問到如果要一個社會完全冇異議聲音、零批評先叫做和諧，北韓可能係佢理想樂土，點知劉生嫌北韓都未算和諧，指嗰度有饑荒，驚食唔飽喎。
香港再出發宣言反應如何有目共睹，劉迺強噚日監人乃後，話主持張寶華理念好接近宣言想法，張寶華不甘被抽水，即時回敬：「我就唔會簽囉！」劉迺強改口「有啲默默支持我哋嘅人。」又話張寶華同情佢，有靚女同情令佢好開心，張寶華即時嗌唔好，「你唔好將啲詞語塞落我個口！」
mailto:[email protected]