不在其位，不謀其政？話雖如此，但總有唔少人，為著唔少個人因由，退任後都唔畀自己（嚴格嚟講係畀其他人）唞一唞。

好似粵港澳大灣區規劃出台前夕，前特首梁振英搶閘亮相攞甜頭，大講其「大灣區人」理念，佢接受《星島日報》訪問時提及大灣區三大發展建議，包括日後香港私家車唔使申請中港牌就可經港珠澳大橋返內地、外國公民持香港永久居民身分證可以免申請簽證進入大灣區，以及在某啲大灣區需要嘅行業，港人若喺該處做嘢只需繳納香港稅率，又話如果冇內地呢個市場，大批港青會失業喎！

查實呢，特首林鄭月娥都對大灣區好上心㗎，除咗不時到大灣區考察，早前仲獲主管港澳事務嘅副總理韓正召見傾大灣，林鄭喺7.1當日上午同傳媒茶敍，仲「爆料」話韓正喺會面45分鐘期間，全程都係聽佢講述意見，無畀任何指示，似乎都想凸顯喺大灣區規劃上，中央好重視佢呢位「現任」特區之首嘅睇法。

眼見「前任」對大灣區咁上心，仲開腔大談構想，唔知林鄭有冇咩特別感受呢？尤其係，梁振英喺訪問中話喎，離任特首後，而家每日都到位於堅道嘅前特首辦返工，強調工作時間同以前一樣，只係性質唔同，唔使再作回應式工作。哦，原來仲日日返緊工㗎喎，似乎對於「特首」呢個身份，仲係好「戀棧」咁噃。