去年12月港人陳棨豪喺台北舉辦嘅第五屆國際發呆比賽入面，贏咗冠軍揚威海外，當時導演彭浩翔都有參加（新聞連結： https://bit.ly/2If0a0V ）。

今年香港都有得玩，「第六屆國際發呆比賽-香港站」聽日喺中環AIA Vitality Park就會舉行，80名參賽者喺90分鐘之內唔可以講嘢、笑同瞓覺，只可以發呆。原本都有報名參加嘅彭導，因為臨時有事唔可以出席，佢接受電話訪問時話：「我原本都貼咗相去發呆網頁，仲攞夠like入圍，不過臨時去唔到。」

彭導以過來人身份，提供一啲小貼士畀參賽者，佢話根據過往嘅經驗，衣、食方面都要注意。

1）唔可以食太飽同飲太多水
彭導話：「唔好食太飽啦，會頂住。參賽時你可以舉牌要求飲水，唔建議飲太多，濕下口算，因為會想去廁所。」

2）服飾以鬆身衫褲最好，女性着長裙最適合
彭導笑話：「你着短裙，現場參賽者梗係歡迎。」

3）揀啱發呆pose
彭導認為啱嘅姿勢都好重要：「一次有人選擇瞓喺度，因為瞓着咗，所以被取消資格。」

彭導話呢類比賽好值得推廣，係俾都市人一個好機會去放空一下，佢話：「其實好少人，特別係我哋呢行，會有60分鐘唔玩手機，係一個好好方法去放鬆自己。其實發呆即係禪坐一種，就算o依家都會養成每日放空自己15分鐘去發呆。」

精選娛聞，喺晒《娛果》
http://fb.com/appledailyent