碧咸19歲大仔Brooklyn一向醉心攝影，日前佢在意大利期間偷拍咗兩張亞洲人士照片，並於Instagram留言：「No place like italy...」，其中一張照片見到大媽們搭船出海，另一張則係一名女子行超市，即被中國網民解讀為諷刺遊意大利嘅中國人，砲轟佢種族歧視，Brooklyn亦立即刪走兩張照片。

大批強國人正趁中國十一黃金周假期殺入世界各地，Brooklyn疑暗指大媽破壞意大利優美環境，其留言公開後即被中國網民留言聲討，紛紛到其IG留言鬧爆，要佢為自己言行道歉，唔止碧咸及Victoria都遭殃，連只得13歲嘅細仔Cruz都被大陸網民爆粗鬧爆，一於以殘體字洗版式炮轟碧咸一家，直指英國人都好冇質素，叫碧咸咪再嚟亞洲吸錢之類。有見及此，Brooklyn已把IG帳戶改成非公開，明顯怕咗被網民瘋狂留言。

上月，碧咸來港出席記者會時，談到管制子女玩社交平台，佢自言除咗對Brooklyn比較自由外，都有監控其餘兩名囝囝點樣利用社交網絡，但大仔有時都會問佢意見先上載內容，相信今次事件都令碧咸十分頭痕。

精選娛聞，喺晒《娛果》
http://fb.com/appledailyent