今年遊戲機界新寵兒一定係任天堂嘅Nintendo Switch（NS）主機，雖然已經推出超過3個月，熱潮仍未見減退。新機在香港的各大電子零售商店，依然缺貨，都唔出奇，奇就奇在原來Switch在日本都係一機難求，非常渴市。近日有網民拍到日本東京街頭，出現超長人龍排隊攞籌抽機，過千名老任粉絲搶購，只有37個幸運兒買到，中獎率竟得3.7%。

有網民在Twitter發佈東京都立川Bic Camera外排隊攞籌買Switch的照片，目測條人龍同本港海之戀賣樓有得揮，據聞人數現場超過1,000人，有網民更將排隊買機嘅人形容為「NS難民」。不過，未知係咪貨源極少，最後得37人成功買到Switch。

由於Switch首批供貨量僅得200萬部，美國、日本一推出即被搶購一空，造成供不應求。《華爾街日報》早前報道，有知情人士透露，任天堂今年銷售目標是1,000萬部，由於新機的熱賣情況超出預期，任天堂要求裝配代工商在截至2018年3月的財年，將Switch的產量至少提高1倍，計劃生產近2,000萬部。

點解Switch仲係一機難求？《華爾街日報》引述業界消息人士指，Switch的部分生產零件與智能手機、PC所需的零件相同，包括NAND Flash（快閃記憶體）、液晶顯示器、微型感測器等，蘋果正大量採購相關零件，雙方正展開零件「爭奪戰」。NAND Flash供應緊絀，或是拖低Switch出貨量的主因。

任天堂都估唔到Switch咁賣得，股價當然冇失威，近日突破了去年7月推出《Pokémon GO》創下的高位，上周五收報34,820日圓，折合約2,457港元，刷新逾8年新高，今年內累升42%。任天堂手遊Super Mario Run去年尾上架，受歡迎程度遜預期，拖累股價下滑，直至今年3月推出Switch才一洗頹勢，再創新高。

掌握財經生活資訊，即Like「蘋果ATM」fb專頁啦！
http://fb.com/appledailyatm