出爐女配角龔嘉欣今晚完騷後接受訪問，講到喺拎獎一刻喊到收唔到聲，嘉欣話：「喺宣佈嗰一刻都有諗過唔係我攞，阿Mo(陳豪)好輕鬆講一句『嘉欣出嚟拎獎！』我就覺得係咪真㗎？真係有啲猶豫。」唔知佢係咪覺得自己未係時候拎獎，所以有呢個感覺？嘉欣話：「呢套劇對於我嚟講，係拍得好辛苦，所以聽到嘅時候，某程度上嚟講，係一種釋放，同埋大家都俾咗好多信心我。」

嘉欣直言都怕令身邊朋友失望：「因為喺頒獎禮前夕，好多朋友都send message俾我，預早祝我攞獎，嗰日都有諗如果我拎唔到會點樣呢？自己又忍唔到，怕個面部表情掩飾唔到個失望，嗰一刻其實係反應唔切。」會唔會請食飯慶祝？嘉欣話：「o依家已經講緊，我一定會請，大家開開心心食餐飯，食乜嘢都得。」

至於會唔會向女主角嘅目標進發，嘉欣話：「其實拎咗獎多咗好多嘢，唔係話唔使努力，去咗另一個階段，反而要更加努力，因為將來嘅表現要一部比一部進步，所以要更努力！」