「呢個女人邊個嚟㗎？」溫和嘅質問，往往比厲聲追問更咄咄逼人。

喺觀塘繞道上面，冷氣充盈嘅的士車廂入面，溫度本來係好適宜。男女乘客喺觀塘上車去馬鞍山，起初都係情侶間常見嘅打情罵俏，再加女乘客呻公司嘅八婆嘢，講吓講吓就一齊睇Facebook，本來就相安無事，但女乘客呢句說話一出口，我估計男乘客體感溫度忽然下降。

「點解嘅？點解有呢張相嘅，我無印象喎。」扮傻唔係聰明嘅做法，只係困喺高速公路上面，想借尿遁都不可行，不敢面對，唯有顧左右而言他。「無印象？佢痴住你塊面嚟影相喎，特登影埋個唇膏印喎，檯面嗰三支大啤呢？又話你唔鍾意飲酒嘅，你嗰晚飲果汁呀？」女人集中上嚟嘅觀察力同細心，平時絕對體會唔到，一個接一個嘅問題，心底嘅怒火開始散發出黎，唔知男乘客可以點拆呢？

「我真係無印象喎，係咪假相嚟㗎。」男乘客盡力將語氣顯得無辜，差在無將手指放喺嘴唇上面。「假相你都講得出？」女乘客突然爆笑，變幻莫測嘅情緒真係估佢唔到，「你不如話你無去過，無見過啤酒，唔識得呢個女人啦。」唔用問句作結，加上甜甜嘅笑容，男乘客嘅戒心放低咗：「都好多年啦，你睇清楚係『當年今日』嚟㗎，張相都成八年前，我唔識佢㗎喇。」呢啲不想記起嘅事，偏偏就係有人不能忘記，例如話Facebook，例如話現任女朋友，歷史嘅真相既然存在過，想胡混過去係無可能。

「即係曾經識佢啦，成日想唔認。」女乘客個嘴嘟出嚟，試問男乘客又點抵抗。「唔係唔認，咁真係過咗好耐嘛，我對佢無嘢㗎啦。」呢句「我對佢無嘢」大概係世界上最無力嘅說話，對其他人有嘢可以有證據，對其他人無嘢點證明？講出嚟又唔信，但係個舉證責任又喺被告身上。「咁點解佢要搵你吖？每隔一年就彈tag咗你哋啲相出嚟，你唔解決呢件事你唔好旨意我會信你呀。」女乘客唔講道理嘅追問確實幾煩，但係Facebook每年提一次嘅當年今日又真係幾令人傷感，人人都有太多唔敢面對嘅歷史真相。

男乘客無再喺呢個問題上面糾纏，拖得一年又一年，再加轉移視線：「我哋影相丫。」唔少人都鍾意喺的士上面影相同打卡，係令人充滿回憶嘅地方。「我啲相就放限時動態，人哋啲相就年年回帶。」影完相，女乘客又有不滿。「點可以咁比較，你下一年睇返實覺得自己唔靚嘅，費事你唔開心啦。」男乘客解釋。「係啫，擺得一陣就自動DEL，都唔知我喺你度有無地位㗎。」女乘客唔會輕易就範，只係預留咗個下台階俾男乘客，男乘客亦及時唸出應有嘅對白：「你梗係喺我心上啦。」

限時動態呢個功能，大抵係網絡社交平台最偉大嘅發明。當下嘅立場再堅定，未到明年今日已不會再失眠，當年嘅友誼萬歲、山盟海誓、你我永遠兩手牽，到頭來只係歷史上嘅圖片。我諗好多人都想限時動態早好多年發明，如果以前有限時動態，咁唱《為自由》時就可以再激昂啲，同時唔怕近三十年後仲有人追問立場，可惜沒有，咁就唯有好似男乘客咁賴皮話：「都好多年啦。」

專欄作者簡介：
白告
我的文字你的故事紅的車廂，我的你的紅的。

Facebook專頁：
https://www.facebook.com/lazytaxi

發掘更多身邊的小城故事，請LIKE 蘋地Facebook Page，並設定為「搶先看」： https://fb.com/appledailyland