擅長演小人物角色，人稱「米奇」的資深演員吳振東，於周二凌晨4時離世。米奇曾演過《A計劃續集》、《無敵幸運星》、《紅燈區》、《新精武門》、《火舞風雲》、《子彈出租》及《絕代雙驕》等電影。與米奇分屬好友的「香港動作特技演員公會」成員張永漢一直都有探望米奇，張永漢今日接受《蘋果》電話訪問時露米奇晚景乏人照顧，由演藝人協會幫忙籌錢租住老人院舍。

張永漢說﹕「我上星期有探望，佢一直有腦退化，同心臟有啲事，最近入院話有啲哮喘同咳嗽，周日去咗廣華醫院後就離開咗。」是否由家人通知？張永漢說：「佢住咗老人院三個月，有咩事老人院會打畀我，其實佢冇屋企人，嗰位係佢前妻，冇仔女。之前佢前妻話照顧唔到，咁我哋知道消息，應承冇錢交會想辦法，我哋演藝人協會，大家就幫忙籌錢負責交老人院費用，我都係幫公會去探望，仲有其他公會嘅人去睇佢。」

張永漢表示自己與米奇相識數十年的朋友，而「香港動作特技演員公會」會長錢嘉樂亦有出一分力，他說：「基本上前輩有乜嘢事，我哋個會都會去探望。暫時未知後事點搞，等演藝人協會同佢前妻商量，因為有個另一個同事同佢前妻有聯絡，但我就唔熟，但有乜需要都可以打畀我。」

精選娛聞，喺晒《娛果》 http://fb.com/appledailyent