政府啱啱出咗新聞稿，表示16位副局、政助，同埋3位政策創新與統籌辦事處嘅人員，準備喺特首辦主任陳國基帶領下，喺下星期一（17/9）出發去北京，參加國家行政學院嘅課程，同埋了解一下國家嘅最新發展。話時話，超級颶風「山竹」星期日就襲港，星期一未知走咗未喎，成班副局政助去唔去得成㗎？

翻查番資料，政府都唔係第一次送班副局政助北上學習㗎喇，不過上次經已係2013年、即係上屆政府嘅事。當年就冇講明邊個帶隊，只係話時任政制局局長譚志源會同埋成個團去拜訪港澳辦。此外，上次北上學習嘅副局政助，唔單止去北京，仲可以去埋湖北省添。

另外，上次政府出稿表示送副局政助北上返學嘅時候，並無解釋點解要北上。到今次再搞北上學習班，政府就講明副局政助「作為政治委任人員，是特區政府管治團隊的一分子，理應加深了解國家的情況」。言下之意，係咪想話有啲副局政助對國家嘅認識唔夠深先？

至於點解現屆政府先有嘅政策創新辦幾位青年人都有份去呢？政府話可以畀佢哋「擴闊視野，有助他們在工作上提出更多創新意念」喎。